Tërmeti/ Mblidhet Këshilli i Sigurisë Kombëtare, i pranishëm gjithë kabineti qeveritar, Rama në krah të Metës

Presidenti Ilir Meta ka mbledhur mëngjesin e sotëm, në orën 08:30, Këshillin e Sigurisë Kombëtare.

Siç shihet në fotografi, i pranishëm në mbledhje është i gjithë kabineti qeveritar, me në krye kryeministri Edi Rama, i cili konfirmoi pjesëmarrjen e tij edhe gjatë mbledhjes së jashtëzakonshme të qeverisë, në orën 07:00 të këtij mëngjesi.

Gjithashtu, të pranishëm në këtë mbledhje janë edhe kryeprokurorja Arta Marku, kreu i Policisë së Shtetit, Ardi Veliu, dhe kreu i Emergjencave Civile, Haki Çako.

Presidenti Meta e ka thirrur Këshillin e Sigurisë Kombëtare pas situatës katastrofike të krijuar nga tërmeti i fuqishëm i 26 nëntorit, ku u shënuan 51 viktima, qindra të plagosur dhe mijëra ndërtesa të rrënuara.